patrimonio

A Xunta anuncia a licitación do retablo maior da igrexa de Santiago Apóstol de Padrón

Xacobeo_jcr — Thu, 23 Oct 2025 11:03:27 +0000

A delegada da Xunta, Belén do Campo, acompañada polo director territorial da Consellería de Cultura, Lingua e Xuventude, Severino Álvarez, anunciou a licitación das obras do retablo maior da igrexa de Santiago Apóstolo que contarán cun orzamento de preto de 100.000 euros. A representante do Goberno autonómico visitou o templo para informar do inicio do expediente de contratación para acometer esta actuación o antes posible e informou que o prazo de execución das obras é de 6 meses.

Segundo explicou a representante autonómica, o proxecto contempla unha intervención integral que abranguerá todos os elementos do retablo, desde o seu soporte estrutural ata os estratos policromos, coa finalidade de asegurar a súa estabilidade, recuperar o seu aspecto orixinal e preservar a autenticidade do conxunto.

Entre as actuacións previstas inclúense a redacción dun proxecto de restauración específico, a limpeza superficial e eliminación de elementos alleos, a desinsectización curativo-preventiva, a fixación dos estratos polícromos, a revisión estrutural dos volumes, así como o reaxuste das carpinterías e o reforzo das ancoraxes, incidindo especialmente no mesado do altar que acolle o “Pedrón”, elemento de grande valor simbólico.

Tamén se levarán a cabo tratamentos dos elementos metálicos, consolidación dos soportes, reintegracións volumétricas e cromáticas, eliminación de repintes, limpeza de policromías e vernices oxidados, e finalmente, a aplicación dunha capa de protección final, xunto coa redacción da memoria técnica da intervención.

A Xunta licita as obras de rehabilitación das Torres de Oeste de Catoira

Xacobeo_jcr — Tue, 25 Mar 2025 09:41:43 +0000

Turismo de Galicia vén publicar na Plataforma de Contratación do Goberno galego a licitación das obras de mantemento e rehabilitación do conxunto monumental Torres de Oeste no Concello de Catoira. Esta é unha acción enmarcada no Plan Xacobeo NextGeneration posto en marcha por Turismo de Galicia con fondos europeos para a rehabilitación e mellora de Bens de Interese Cultural de titularidade pública vencellados ao Camiño de Santiago. As empresas terán ata o 15 de abril para presentar as súas propostas e o importe da licitación ascende a 420.450,80 euros.

A actuación licitada inclúe o retellado da cuberta da igrexa, restauración da imaxe do Apóstolo Santiago, colocación de novas portas, mellora do badalado da campá e colocación dun panel informativo exterior. Tamén se instalará unha nova caseta informativa, procederase á desmontaxe de pórticos da pérgola e recolocación de columnas como borde lateral de camiños e acondicionamento do paseo. Ademais, mellorase a iluminación exterior existente e realizarase o mantemento das zonas axardinadas.

Plan Xacobeo Next Generation

Esta acción enmárcase nos distintos proxectos que a Xunta de Galicia está a acometer cos fondos europeos que foron asignados á Comunidade galega dentro do Plan de Recuperación, Transformación e Resiliencia da Unión Europea. En concreto, forma parte do Plan Xacobeo NextGeneration, que inclúe a posta en marcha de distintas liñas de axuda, a sinalización da rede cicloturística Eurovelo ou a rehabilitación de varios BIC do Camiño de Santiago.

XIII Congreso Internacional de Estudos Xacobeos. Metrópoles: Santiago e Roma. 900 anos de historia

Xacobeo_jcr — Tue, 23 Apr 2024 07:06:48 +0000

O 23 de xuño de 1124 o papa Calisto concedeu, despois de longas discusións, a dignidade arcebispal “informatuum” a Santiago de Compostela en reverencia ao apóstolo Santiago. A nova dignidade metropolitana provocou no norte da península grandes discusións con Braga, Toledo e, en parte, Tarragona. O centro de peregrinación compostelán necesitou neste contexto o apoio papal –documéntano non só fontes clave como a Historia Compostellana, senón tamén o Liber Sancti Jacobi, atribuído á autoridade de Calisto II, así como outros documentos e obxectos artísticos.

Esta efeméride será o punto de partida dun congreso conmemorativo que tratará as relacións entre Roma e Santiago, ás veces conflitivas, pero tamén construtivas. O seu obxectivo será estudar non só o seu impacto na peregrinación xacobea, senón tamén en cuestións como a lexitimación dos votos, a Reconquista e as ordes militares, a posición de Compostela durante o Gran Cisma do Occidente e a influencia española e compostelá durante o século XVI en Roma. A cultura material, a escritura e a forma de organizar as cartas episcopais é así mesmo un bo testemuño do prestixio dos modelos papais. Un fenómeno que mesmo se pode observar na “reinvención” da tumba do Apóstolo e a bula Deus omnipotens de León XIII. É unha casualidade que nesta época da reinvención moitos dos arcebispos composteláns foran elevados tamén a cardeais na curia?

Tentarase así mesmo reflexionar sobre a palabra metrópole nos seus aspectos diversos porque, con esta dignidade, Compostela converteuse non só en arcebispado, senón tamén en metrópole dos peregrinos e da cultura.

Proponse dividir o congreso en catro apartados organizados tematicamente e abranguer deste xeito un arco temporal de máis de mil anos. Contarase coa participación dunha gran número de especialistas internacionais de diferentes disciplinas (historia, teoloxía, dereito canónico, historia da arte, socioloxía, ciencias políticas) co obxectivo de obter unha visión de conxunto dunha cuestión tan rica e variada.

Coordinación: Klaus Herbers, catedrático de Historia Medieval e Ciencias Auxiliares na Universität Erlangen-Nürnberg (Alemaña) e membro do Comité Internacional de Expertos do Camiño de Santiago.

Data: 26-29 de xuño de 2024

Lugar: Auditorio ABANCA
Dirección: Rúa do Preguntoiro, 23, Santiago de Compostela

Promove: Comité Internacional de Expertos do Camiño de Santiago
Organiza: S.A. de Xestión do Plan Xacobeo. Turismo de Galicia. Xunta de Galicia
Colabora: ABANCA Obra Social

Inscrición: gratuíta, ata completar capacidade. Do 22/04/2024 ao 21/06/2024.

Enviar o Formulario de inscrición que se achega a: cultura.xacobeo@xunta.gal

Información: cultura.xacobeo@xunta.gal

A Xunta de Galicia inaugura a exposición Tesouros Reais, que trae a Galicia obras do Museo Terra Santa de Xerusalén

Xacobeo_jcr — Fri, 22 Mar 2024 11:07:48 +0000

O presidente da Xunta en funcións, Alfonso Rueda, inaugurou a exposición Tesouros Reais. Obras mestras do Terra Sancta Museum no Museo Centro Gaiás da Cidade da Cultura. Será a primeira vez que estas pezas se expoñan en España e, ademais, Galicia será o único destino nacional no que se poderá visitar.

A exposición é unha mostra internacional na que se exporá parte do tesouro artístico doTerra Sancta Museum de Xerusalén, sendo a maior parte desta colección doazóns que as casas reais católicas europeas foron facendo ao longo de 500 anos. Ademais, a exposición complétase cunha escolma de pezas do Museu Calouste Gulbenkian de Lisboa, que tamén colabora na iniciativa; e con obras doutras institucións galegas e portuguesas.

Polo tanto, os visitantes que se acheguen -desde o 22 de marzo ata o 4 de agosto- poderán coñecer importantes producións da arte europea e sacra, o que lles permitirá facer un percorrido pola historia, así como comprender mellor o impacto da cristiandade en Xerusalén.

A Xunta de Galicia rehabilitará o retablo da capela da Venerable Orde Terceira en Mondoñedo

Xacobeo_jcr — Thu, 21 Mar 2024 07:24:41 +0000

A Xunta de Galicia ampliará o alcance dos traballos feitos na capela da Venerable Orde Terceira do antigo Convento de Alcántara, en Mondoñedo, actuando tamén no retablo. Este valioso recurso cultural do Camiño do Norte onde o Goberno galego vén de resolver as patoloxías e danos que afectaban ao inmoble.

Actualmente os técnicos están a realizar estudos arquitectónicos co fin de procurar a mellor proposta de restauración posible.

No caso da obra que vén de rematar, as actuacións centráronse en resolver danos tanto no exterior como no interior da capela, que presentaba un aspecto moi descoidado con problemas relacionados coa presenza de humidades e o uso de materiais inadecuados.

Así na zona de capela o obxectivo foi crear un ambiente óptimo para a conservación, reverter as intervencións desafortunadas, comunicar de novo a capela coa Igrexa de San Pedro e adecuar o conxunto para os usos habituais recuperando, na medida do posible, o aspecto orixinal.

Nas fachadas, pola súa banda, os traballos estiveron dirixidos a mellorar as condicións de humidade mediante a eliminación dos revestimentos de cemento, a aplicación dunha nova revocadura e a creación dunha nova drenaxe na base dos muros. Ademais, na cuberta instaláronse novos canalóns e baixantes e modificouse o cumio formado por tella por un de lousas.

En canto ás madeiras, no transcurso das actuacións substituíuse a escaleira de caracol reforzando a varanda, incorporouse unha nova ventilación nas ventás e restaurouse o portalón exterior e as portas interiores. Por último, a proxecto tamén contemplou a creación dunha nova instalación eléctrica e a renovación das pinturas.

Coloquio Internacional “De Conques a Santiago de Compostela. Textos, monumentos e actores”

Xacobeo_jcr — Mon, 19 Feb 2024 08:04:07 +0000

Actividade do grupo de investigación “Historia social do poder desde a Idade Media” (cód. 641449) do Instituto de Estudos Galegos Padre Sarmiento (CSIC-Xunta de Galicia) no marco do PIE do CSIC “Investigación do patrimonio cultural galego relacionado coas estruturas e as relacións de poder desde distintos enfoques: documental, social, institucional ou de xénero” (ref. 202210E014) cuxa IP é a Dr.ª Amparo Rubio Martínez (IEGPS, CSIC-Xunta de Galicia).

Dirección:

Dr.ª Adeline Rucquoi
Centre National da Recherche Scientifique (CNRS), Instituto de Estudos Galegos Padre Sarmiento (CSIC-Xunta de Galicia)

Data: 26 e 27 de febreiro de 2024

Lugar: Salón de Actos do Antigo Hospital de San Roque
Dirección: Rúa de San Roque, nº 2. Santiago de Compostela

Organiza: Instituto de Estudos Galegos Padre Sarmiento. Consello Superior de Investigacións Científicas. Xunta de Galicia

PROGRAMA

Os Camiños cara a Compostela, Itinerario Cultural Europeo e Patrimonio Mundial: Historia, problemáticas e perspectivas

Xacobeo_jcr — Mon, 12 Feb 2024 12:36:13 +0000

A Universidade Toulouse Capitole organiza unha conferencia científica internacional para examinar os Camiños de Santiago de Compostela e o seu dobre recoñecemento, como Primeiro Itinerario Cultural do Consello de Europa e Patrimonio Mundial da UNESCO. Os temas principais refírense á historia da peregrinación, o patrimonio dos camiños, a análise do público, as cuestións da mediación e a cobertura mediática, o turismo espiritual e o turismo slow, para ofrecer unha visión única deste ben común da Humanidade. Presentaranse 44 comunicacións de 50 investigadores de 12 países que son historiadores, xeógrafos, xuristas, teólogos, sociólogos, xestores ou especialistas en ciencias políticas e ciencias da información e a comunicación.

Datas: 4 e 5 de abril de 2024

Lugar: Hôtel-Dieu Saint-Jacques, Toulouse (Francia)

Organiza: Université Toulouse Capitole

Información e inscrición: https://www.compostelle-lecolloque.org/

PROGRAMA

Conmemoración dos 800 anos do inicio da construción da Igrexa de San Salvador de Vilar das Donas (12224-2024)

Xacobeo_jcr — Tue, 06 Feb 2024 07:35:53 +0000

Con Motivo dos 800 anos do inicio da construción da Igrexa de San Salvador de Vilar das Donas, O Centro de Documentación e Interpretación da Comarca da Ulloa, en colaboración coa Parroquia de San Salvador de Vilar das Donas (Bispado de Lugo), o Instituto de Estudos Ulloans (IEU), Metátese Teatro e a Orde das Donas e Cabaleiros do Priorato de Vilar das Donas ”Os Lobos”, está a organizar varias actuacións conmemorativas da citada efeméride.

SELO DE CAUCHO:

Desde o un de xaneiro de 2024 na Igrexa de San Salvador de Vilar das Donas pódese selar a credencial do Camiño de Santiago con un selo conmemorativo.

CREDENCIAL DE VILAR DAS DONAS (EDICIÓN 2024):

Desde 2022 aqueles que visitan a Igrexa de San Salvador de Vilar da Donas contan cunha credencial (física ou dixital) que acredita a súa visita a un dos referentes do Camiño de Santiago en Galicia.

MÁIS INFORMACIÓN: cdiaulloa@vilardasdonas.org.es – Tlf.: 670 523 688

A Xunta lanza un novo produto para diversificar o Camiño de Santiago no horizonte do Xacobeo 2027

Xacobeo_jcr — Thu, 25 Jan 2024 12:40:48 +0000

A Xunta de Galicia vén de poñer en marcha un novo produto turístico que busca diversificar e promover todos os itinenarios do Camiño de Santiago co propósito de repartir a peregrinación polas diferentes rutas no horizonte do Xacobeo 2027.

O produto Os 27 lugares con encanto de 2027, unha escolma que reúne diferentes recursos e monumentos menos coñecidos, foi presentado na Feira Internacional de Turismo, Fitur.

A guía amosa eses pequenos ‘tesouros’ e lugares con encanto distibuídos polas catro provincias e os itinerarios xacobeos. Inclúense, por exemplo, A Igrexa de San Xoán (Pedrafita do Cebreiro), no Camiño Francés; A Pobra de Burón (A Fonsagrada), no Camiño Primitivo; o Santuario de Arante (Ribadeo), no Camiño do Norte; Ponte das Febres (Tui), no Camiño Portugués; San Martiño de Xubia (Narón), no Camiño Inglés ou A Ponte de Vilanova (Allariz), na Vía da Prata, entre outros moitos.

Trátase dun produto que é unha pequena mostra dos Camiños xacobeos que percorren Galicia ao longo de máis de 1.500km.

Inclúense desde igrexas, castelos, pontes, caminos medievais, dólmenes, ferrerías, illas e castros. Está dispoñible para a súa consulta na páxina web de Turismo de Galicia.

Galicia organizará o vindeiro ano a XXVII edición da exposición ‘Las Edades del Hombre’ xunto a Castela e León

Xacobeo_jcr — Fri, 15 Dec 2023 10:43:43 +0000

O presidente da Xunta, Alfonso Rueda, asinou un convenio co titular da Junta de Castela e León, Alfonso Fernández Mañueco, para colaborar na celebración da XXVII edición da exposición Las Edades del Hombre que no 2024 terá unha dobre sede: en Santiago de Compostela e en Vilafranca do Bierzo.

A sinatura do convenio levouse a cabo no santuario de Santa María a Real do Cebreiro, lugar de orixe do sacerdote Elías Valiña que, desde os anos 60, foi un dos principais promotores da recuperación do Camiño Francés, impulsor da colocación das frechas amarelas no percorrido ou de mellorar as condicións nas que os peregrinos realizan a senda.

Las Edades del Hombre

Trátase un proxecto cultural e expositivo promovido por Castela e León desde 1988 e que busca poñer en valor o patrimonio cultural tanto como reforzo social como xerador de riqueza. Ata o momento, celebráronse 26 edicións que contaron con máis de 12 millóns de visitantes e nas que se expuxeron 5.228 pezas de arte e se restauraron outras 2.000.

En cada edición, a exposición conta cun relato común e inclúe labores de investigación, difusión, restauración de pezas así coma unha montaxe que sempre ten a innovación como eixo principal e na que teñen moita importancia elementos multimedia (recreacións en 3D, proxeccións audiovisuais, pantallas interactivas…) ou a música.

Pese a que a maioría de edicións tiveron lugar en Castela e León, tamén se levaron a cabo en Madrid, Cádiz, Bélxica ou Nova York.