O obxectivo da xuntanza mantida foi informar das liñas xerais de traballo, toda vez que se está a ultimar a redacción do proxecto de intervención. Unha vez rematado, será remitido a cada un dos concellos da Vía da Prata –máis dunha trintena repartidos polas provincias de Ourense, Pontevedra e A Coruña– para poder ter en conta as súas posibles observacións.

Dáse así continuidade ás iniciativas desenvolvidas neste tempo nos albergues da Bandeira (Silleda), A Gudiña, Faramello (Teo), Cea, Xinzo de Limia, Riós, Verín, Vilar de Barrio, Vedra ou Sandiás. Así mesmo, a primeira edición do premio Galicia Parabéns recaeu tamén na Vía da Prata, ao recoñecer as tarefas de embelecemento impulsadas polo Concello de Boqueixón arredor do Pico Sacro, un dos referentes simbólicos da peregrinación xacobea.

Neste liña, está prevista a inminente intervención no albergue de Bendoiro, en Lalín, cuxa reparación foi contratada por un importe superior aos 250.000 euros. Este investimento permitirá actuar sobre as patoloxías que viña arrastrando e que causaban especial deterioro en distintas partes da estrutura, as cubertas, carpinterías, fachadas e terrazas.

Así mesmo, está previsto o acondicionamento ou construción dun albergue ao longo da Vía da Prata para dar reposta ás necesidades dos peregrinos á cabalo, unha das opcións que permiten obter a Compostela. Ao respecto, cómpre ter en conta que, desde a aprobación do Plan Director do Camiño de Santiago, a Xunta de Galicia vén traballando na especialización da Vía da Prata como itinerario preferentemente especializado nesta modalidade.

A Vía da Prata mantén nos últimos anos unha afluencia constante de peregrinos que a leva a superar os 9.000, cunha importante marxe de crecemento por diante. O 60% deles son españois, malia que tamén destacan outras nacionalidades como portugueses, alemáns, italianos, franceses, estadounidense, británicos, holandeses e belgas.

Na actualidade, a rede pública de albergues dependente da Consellería de Cultura e Turismo conta con 13 albergues e máis de 400 prazas. Nos últimos anos, a S. A. de Xestión do Plan Xacobeo asumiu a xestión directa dalgúns deles que foron cedidos polos concellos.

As actuacións previstas na Vía da Prata para 2019 amplían o alcance das xa realizadas no Camiño Francés en 2015, no Camiño do Norte e o Camiño Primitivo en 2016, no Camiño Inglés e no Camiño de Fisterra e Muxía en 2017 e no Camiño Portugués e no Camiño Portugués da Costa en 2018. A programación completarase en 2020, a tempo para o Xacobeo 21, coa actuación no Camiño de Inverno e na Ruta do Mar de Arousa e Río Ulla.

As primeiras conclusións do informe foron expostas polo profesor Melchor Fernández, que dirixiu o estudo xunto a Dolores Riveiro, membros do Grupo de Análise e Modelización Económica (GAME) do Instituto Universitario de Estudos e Desenvolvemento de Galicia (IDEGA) da USC e en coordinación cos técnicos especialistas da Área de Estudos e Investigación de Turismo de Galicia.

Esta investigación, incluída no Plan director do Camiño de Santiago, amosa un forte impacto económico, un intenso impacto a escala local e a satisfacción que xera entre os residentes, que foron enquisados como parte do traballo de campo. Amais, o informe subliña o exemplo de sustentabilidade e medioambiental que representa o modelo da ruta xacobea.

No eido do impacto económico, o estudo revela que os peregrinos concentran o 2,3% do gasto turístico na Comunidade galega, pero á vez cada un deles supón o mesmo impacto económico que 2,3 turistas nacionais, pola diferenza que constitúe en estadía media, gasto medio e multiplicador. Desde xeito, cada euro de gasto do peregrino xera ata un 11% máis de produto e ata un 18% máis de emprego. Ademais, un 80% volverán como turistas no futuro.

Preguntados pola influencia do Camiño de Santiago nos seus concellos, os residentes dan unha valoración moi positiva, en especial para o conxunto da poboación. Maioritariamente consideran que o concello prosperou e que os beneficios son superiores aos costes.

Os veciños aprecian impactos económicos favorables nos ingresos e nivel de vida dos seus municipios, o comercio local, as posibilidades de emprego ou a actividade turística.

Amdeais, non notan impactos negativos. Perciben que o Camiño de Santiago non perxudica a outras actividades e que os seus beneficios son para residentes do propio concello.

O Camiño de Santiago non xera conflitos entre os residentes, que afirman que non dificulta a mobilidade nin o acceso aos diferentes servizos municipais. Ten, así mesmo, un impacto cultural positivo, sobre todo en relación á restauración e a mellora do patrimonio. Amais, os veciños ven no Camiño de Santiago unha oportunidade para coñecer outras culturas.

Tamén no referido ao impacto demográfico os expertos da USC conclúen que a percepción é positiva, pois contribúe ao mantemento da poboación. Aínda que, en liña coa tendencia xeral da Comunidade, as dinámicas son regresivas, a análise permite comprobar que estas foron atenuadas pola peregrinación. Ademais, a poboación vinculada e as estimacións de poboación equivalente, incluíndo o peso dos camiñantes, soe amosar unha pegada efectiva.