Xacobeo

A Rede Pública de Albergues do Xacobeo recibe o premio Q 2026 que concede o Ictes pola súa aposta pola sostibilidade turística

Xacobeo_jcr — Tue, 20 Jan 2026 08:30:10 +0000

A Rede Pública de Albergues do Xacobeo vén de ser galardoada nesta edición co Premio Q 2026 que outorga o ICTES (Instituto para a Calidade Turística Española e a Sustentabilidade) que recoñece a aposta desta rede pola Sustentabilidade Turística ao seren recoñecidos moitos dos seus establecementos coa marca S de Sustentabilidade do ICTES.

A entrega da distinción terá lugar o 22 de xaneiro de 2026, coincidindo coa celebración de Fitur, no Palacio de Cibeles, en Madrid.

A Rede Pública de Albergues do Camiño de Santiago, depende de Turismo de Galicia a través da S.A. de Xestión do Plan Xacobeo, e está formada por setenta e seis centros aloxativos que oferta máis de máis de tres mil catrocentas prazas.

O premio recoñece o esforzo da Xunta de Galicia pola calidade e a sustentabilidade. No ano 2025, 25 albergues de peregrinos da rede pública do Xacobeo acadaron a certificación de S de Sostibilidade Turística. En total, están acreditados con esta marca 31 albergues galegos.

A comunidade galega é a segunda en números absolutos en certificacións Q de Calidade Turística en España, só por detrás de Andalucía. Neste sentido, conta con certificación Q un total de 322 establecementos repartidos polo territorio galego.

No que atinxe á S de Sustentabilidade, en 2025 están acreditados un total de 108 establecementos, empresas, infraestruturas e recursos da comunidade galega que ocupa a terceira posición en números absolutos.

XVI Leccións Xacobeas Internacionais da USC: sabios do Camiño de Santiago e a peregrinación 🗓

Xacobeo_jcr — Wed, 18 Jun 2025 08:31:36 +0000

O Museo das Peregrinacións de Santiago de Compostela acollerá o próximo mes de xullo as XVI Leccións Xacobeas Internacionais, baixo o título Sabios do Camiño de Santiago e a peregrinación. Xa está aberto o prazo de inscrición para asistir a este encontro, que reunirá un ano máis en Santiago a expertos internacionais en historia das peregrinacións, que compartirán as súas investigacións sobre este fenómeno e sobre o Camiño de Santiago, en particular.

Estas xornadas, organizadas pola Cátedra Institucional do Camiño de Santiago e dás Peregrinacións, enmárcase nos cursos de verán promovidos pola Universidade de Santiago de Compostela. Así, os participantes matriculados en graos nesta universidade obterán 2 créditos pola súa asistencia a este encontro. Ademais, os estudantes matriculados nun doutoramento da USC terán como recoñecemento de asistencia un cómputo total de 10 horas.

As persoas interesadas poden inscribirse online en:
https://www.usc.gal/gl/servizos/area/cultura/extension/universidade-veran/leccions-xacobeas-internacionais-usc-sabios-camino-santiago-peregrinacion-16a-edicion-14462

Ou presencialmente en:
ampus de Compostela: Área de Cultura- Pazo de San Xerome (Rectorado). Praza do Obradoiro s/n.
Telf. 881811018/ 881811103
Campus de Lugo: Área de Cultura- Pazo de Montenegro. Praza da Universidade. Telf. 982821513

A taxa xeral de matrícula é de 120€.
A taxa reducida é de 70€ e é aplicable a: estudantes universitarios, de bacharelato ou e formación profesional; pensionistas; persoas desempregadas; socios/as da Asociación de Antigos Alumnos da USC; Persoal Docente e Investigador e Persoal de Administración e Servizos da USC.

Información e programa:
leccionesjacobeas@somos100x100.es

Exposición “Camiño de Santiago, primeiro itinerario cultural europeo” 🗓

Xacobeo_jcr — Wed, 05 Feb 2025 07:10:42 +0000

Esta exposición fotográfica representa a todos os territorios integrados ata agora na Federación Europea do Camiño de Santiago. Paisaxes, camiños, patrimonio cultural e peregrinos de Polonia, Ucraína, Lituania, Croacia, Italia, Países Baixos, Bélxica, Francia, España e Portugal forman parte dunha xeografía sagrada, unha creación cultural común chamada Camiño de Santiago. A peregrinación a Compostela, que comezou no século IX, desenvolveu ao longo dos séculos un rico acervo de coñecementos e cultura, constituíndo un dos piares máis sólidos da identidade europea.

As imaxes mostran claramente a folla deste itinerario cultural. Territorios, camiños, cidades históricas, igrexas e peregrinos de Vilnius en Lituania e Toruń e Pomorskie en Polonia; patrimonio cultural ucraíno e camiños en Vinnytsia; cidades, templos e camiños na costa adriática, en Dubrovnik, Istria e Šibenik; o camiño de Compostela en Toscana, representado polo cruzamento de rutas de peregrinación chamado Borgo Sansepolcro, e a Compostela italiana, Pistoia, cuxa catedral alberga unha reliquia do apóstolo desde o século XII.

Outros camiños e patrimonio histórico na provincia holandesa de Limburgo e a belga de Namur, onde tamén se conserva unha reliquia de Santiago o Maior; continuando en Francia cos seus camiños a Compostela e en España co Camiño Francés, a través de Aragón, Navarra, La Rioja, Castela e León e Galicia; e tamén coas rutas do norte, representadas polo Camiño Lebaniego, en Cantabria, e as rutas asturianas, entre as que sempre destaca Oviedo. Tamén se presenta un resumo do Camiño Mozárabe de Santiago en Andalucía, representado polo territorio e a arte de Córdoba.

Por último, unha evocación do Camiño de Santiago en Portugal, nas terras de Vila Pouca de Aguiar e as outras rutas portuguesas que conducen a Compostela, representadas polo Monte do Gozo, primeiro emprazamento do Camiño Francés desde o que se divisa a cidade do apóstolo, e o Pórtico da Gloria da Catedral compostelá, xoia da arte medieval europeo.

Lugar: Centro Cultural WeGil

Dirección: Largo Ascianghi, 5. Roma (Italia)

Data: 5 de febreiro – 5 de marzo de 2025

Organiza: Federación Europea do Camiño de Santiago

Colabora: Xunta de Galicia e Rexión de Lazio

A revista científica ‘Ad Limina’ premiada pola Asociación de Periodistas e Estudosos do Camiño

Xacobeo_jcr — Mon, 02 Dec 2024 13:50:14 +0000

A revista de divulgación científica cultura Ad Limina resultou galardoada co XII Premio Internacional da Asociación de Periodistas e Estudosos do Camiño (APECSA).

Ad limina é unha revista científica editada por Turismo de Galicia, a través da Sociedade Anónima de Xestión do Plan Xacobeo, dirixida a un amplo espectro de investigadores sobre Santiago e a civilización da peregrinación en xeral e que, da man do Comité de Expertos do Camiño de Santiago, se publica anualmente desde 2010. A revista preséntase sempre en xullo, mes no que se celebra a Festividade do Apóstolo Santiago e o Día de Galicia, e esta presentación cadra cunha reunión plenaria do devandito comité.

Baixo a dirección de Manuel Antonio Castiñeiras González, catedrático de Historia Medieval da Universitat Autònoma de Barcelona e presidente do Comité de Expertos, a revista foi incluída durante estes últimos anos nos seguintes índices e bases de datos nacionais e internacionais.

Ademais de versión impresa tamén conta cunha dixital creada en 2016, e nestes oito anos de presenza na internet, o seu impacto multiplicouse de xeito excepcional; tendo en conta que se trata dunha revista académica tal e como reflicten os datos de descargas tanto de artigos como de volumes completos así o testemuñan. A súa presenza nestes repositorios, nacionais e internacionais, axudaron de xeito definitivo a que o seu impacto medrase moito nos últimos anos.

Fausto Isorna. O Camino en viñetas 🗓

Xacobeo_jcr — Wed, 13 Nov 2024 08:57:19 +0000

Simón Martel é un personaxe do cómic galego cunha longa traxectoria, pois xa leva protagonizados sete libros. Naceu no ano 1994, no álbum A irmandade dos lectores tristes, escrito por Aníbal Malvar e debuxado por Fausto Isorna. Pouco despois uníuselles o guionista Rober Méndez, e desta colaboración xurdiron Flores dende Hiroshima, No nome da amada morta e A maldición dos Velasco, convertendo a Simón no primeiro personaxe da historieta galega cuxos libros se editaban comercialmente. Despois dunha paréntese de varios anos, Simón volveu á acción nos álbums Están vivas! (2006) e Enigma soterrado (2009), con guión e debuxos de Fausto. Camiño de Santiago. As aventuras xacobeas de Simón Martel realizouse para celebrar o Xacobeo 2021-2022. Completouse en 2024 co relato da fin da viaxe, as páxinas que narran o percorrido de Santiago a Fisterra.

Agora preséntase no Museo das Peregrinacións e de Santiago a exposición “Fausto Isorna. O Camiño en Viñetas”, do 7 de novembro de 2024 ao 17 de xaneiro de 2025, que recolle ilustracións orixinais, bosquexos, vinilos de gran formato etc., deste recoñecido debuxante.

Data: 8 de novembro de 2024-30 de marzo de 2025
Lugar: Museo das Peregrinacións e de Santiago. Santiago de Compostela
Organiza: Turismo de Galicia

Convocatoria de axudas ás Asociacións de Amigos do Camiño de Santiago e outras entidades que teñan como finalidade a promoción do Camiño de Santiago e a súa peregrinación – 2024

Xacobeo_jcr — Tue, 13 Aug 2024 08:23:58 +0000

A Sociedade Anónima e Xestión do Plan Xacobeo, prevé, no seu obxecto social as relacións coas asociacións de amigos do Camiño de Santiago. Considerase clave a colaboración a distintos niveis coas devanditas entidades, pois son historicamente o máis relevante factor de dinamización desde a sociedade civil do Camiño e das súas rutas, tanto en Galicia, como no resto de España e noutros países do mundo.

As solicitudes presentaranse obrigatoriamente por medios electrónicos a través do formulario normalizado dispoñible na sede electrónica da Xunta de Galicia, https://sede.xunta.gal.

Se algunha das persoas interesadas presenta a súa solicitude presencialmente, requiriráselle para que a emende a través da súa presentación electrónica. Para estes efectos, considerarase como data de presentación da solicitude aquela na que fose realizada a emenda.

Para a presentación das solicitudes poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave365 (https://sede.xunta.gal/chave365) para o que se habilita un enlace na Guía de procedementos e servizos co código CT300A.

Excepcionalmente, no caso de entidades estranxeiras que non dispoñan de mecanismos de identificación e sinatura admitidos pola sede electrónica da Xunta de Galicia, poderán presentar as solicitudes presencialmente, en calquera dos lugares e rexistros establecidos na normativa reguladora do procedemento administrativo común, utilizando o formulario normalizado dispoñible na sede electrónica da Xunta de Galicia, https://sede.xunta.gal.

O prazo de presentación de solicitudes será dun mes contado a partir do día seguinte ao da publicación desta orde no Diario Oficial de Galicia. Se o último día do prazo fose inhábil, entenderase prorrogado ao primeiro día hábil seguinte.

As bases poderanse consultar na sede da Sociedade Anónima de Xestión do Plan Xacobeo, na web https://www.turismo.gal/espazo-institucional/xacobeo/convocatorias, ou nos teléfonos 881 996 264 / 881 996 265.

A Xunta cede ao concello de Arzúa a antiga Casa de Correos que acollerá un centro sociocultural Xacobeo destinado a veciños e peregrinos

Xacobeo_jcr — Wed, 07 Aug 2024 09:10:33 +0000

O director de Turismo de Galicia, Xosé Merelles, asinou co alcalde de Arzúa, Xoán Xesús Carril, o contrato de cesión de uso da Casa de Correos e da Horta Anexa pola que o Goberno autonómico cede este inmoble ao concello para usos socioculturais para veciños e peregrinos. Dáse así cumprimento a unha antiga reivindicación do municipio de Arzúa para dinamizar o inmoble.

En virtude deste acordo de cesión da antiga casa de correos, situada na rúa Dores número 3 e a súa horta anexa propiedade do Xacobeo, pasará a ser xestionada polo concello de Arzúa. O edificio linda coa Capela da Madanela e o albergue de peregrinos do Xacobeo e a partir de agora poderá albergar actividades culturais xacobeas que poñan en valor patrimonio material e inmaterial galego e axuden a entender a realidade do Camiño de Santiago e a peregrinación. O edificio porase a disposición do Concello nas condicións axeitadas para a súa operatividade.

En virtude do acordo, o Concello asumirá os custos do mantemento e xestión ordinarias do inmoble, tamén se responsabilizará de contratar e costear a contratación do persoal necesario para mantemento e atención, entre outras actuacións. A cesión ten carácter gratuíto e realízase por un prazo de catro anos, que pode prorrogarse outros catro anos máis sempre que medie acordo expreso das partes.

XIII Congreso Internacional de Estudos Xacobeos. Metrópoles: Santiago e Roma. 900 anos de historia

Xacobeo_jcr — Tue, 23 Apr 2024 07:06:48 +0000

O 23 de xuño de 1124 o papa Calisto concedeu, despois de longas discusións, a dignidade arcebispal “informatuum” a Santiago de Compostela en reverencia ao apóstolo Santiago. A nova dignidade metropolitana provocou no norte da península grandes discusións con Braga, Toledo e, en parte, Tarragona. O centro de peregrinación compostelán necesitou neste contexto o apoio papal –documéntano non só fontes clave como a Historia Compostellana, senón tamén o Liber Sancti Jacobi, atribuído á autoridade de Calisto II, así como outros documentos e obxectos artísticos.

Esta efeméride será o punto de partida dun congreso conmemorativo que tratará as relacións entre Roma e Santiago, ás veces conflitivas, pero tamén construtivas. O seu obxectivo será estudar non só o seu impacto na peregrinación xacobea, senón tamén en cuestións como a lexitimación dos votos, a Reconquista e as ordes militares, a posición de Compostela durante o Gran Cisma do Occidente e a influencia española e compostelá durante o século XVI en Roma. A cultura material, a escritura e a forma de organizar as cartas episcopais é así mesmo un bo testemuño do prestixio dos modelos papais. Un fenómeno que mesmo se pode observar na “reinvención” da tumba do Apóstolo e a bula Deus omnipotens de León XIII. É unha casualidade que nesta época da reinvención moitos dos arcebispos composteláns foran elevados tamén a cardeais na curia?

Tentarase así mesmo reflexionar sobre a palabra metrópole nos seus aspectos diversos porque, con esta dignidade, Compostela converteuse non só en arcebispado, senón tamén en metrópole dos peregrinos e da cultura.

Proponse dividir o congreso en catro apartados organizados tematicamente e abranguer deste xeito un arco temporal de máis de mil anos. Contarase coa participación dunha gran número de especialistas internacionais de diferentes disciplinas (historia, teoloxía, dereito canónico, historia da arte, socioloxía, ciencias políticas) co obxectivo de obter unha visión de conxunto dunha cuestión tan rica e variada.

Coordinación: Klaus Herbers, catedrático de Historia Medieval e Ciencias Auxiliares na Universität Erlangen-Nürnberg (Alemaña) e membro do Comité Internacional de Expertos do Camiño de Santiago.

Data: 26-29 de xuño de 2024

Lugar: Auditorio ABANCA
Dirección: Rúa do Preguntoiro, 23, Santiago de Compostela

Promove: Comité Internacional de Expertos do Camiño de Santiago
Organiza: S.A. de Xestión do Plan Xacobeo. Turismo de Galicia. Xunta de Galicia
Colabora: ABANCA Obra Social

Inscrición: gratuíta, ata completar capacidade. Do 22/04/2024 ao 21/06/2024.

Enviar o Formulario de inscrición que se achega a: cultura.xacobeo@xunta.gal

Información: cultura.xacobeo@xunta.gal

Presentación do libro “Voces peregrinas. Un canto al Camino en femenino”

Xacobeo_jcr — Mon, 19 Feb 2024 07:42:17 +0000

Con motivo do próximo día Internacional da Muller, preséntase o libro Voces peregrinas. Un canto al Camino en femenino, publicado pola Asociación Jacobea de Almería-Granada Camino Mozárabe, realizado coa participación de 66 mulleres peregrinas procedentes dos 5 continentes que fixeron o Camiño de Santiago ou estiveron presentes na súa condición de hospitaleiras voluntarias durante 2023.

Este libro contou co financiamento da Xunta de Galicia, a través da S.A. de Xestion do Plan Xacobeo.

Fecha: 9 de marzo de 2024
Hora: 12:00

Lugar: Museo das Peregrinaciones e de Santiago
(Praza de Praterías, s/n)

Organiza: Asociación Jacobea de Almería-Granada Camino Mozárabe.

Acollida e Hospitalidade no Camiño de Santiago. Fotografías de Manuel G. Vicente 🗓

Xacobeo_jcr — Tue, 12 Dec 2023 08:00:03 +0000

Con motivo da celebración dos actos do 30 Aniversario da Declaración do Camiño de Santiago como Patrimonio Mundial, a Xunta de Galicia organiza a exposición Acollida e Hospitalidade no Camiño de Santiago. Fotografías de Manuel G. Vicente.

Unha experiencia hospitalaria e solidaria, vivida e creativa, a carón dos peregrinos, no Camiño de Santiago, nos albergues e na meta da peregrinación xacobea, en harmonía coa celebración do Xubileo da Misericordia.

Un espazo compartido de valores universais
O exercicio da hospitalidade, a acollida ao peregrino, é un valor considerado dende hai séculos coma a pedra angular do Camiño de Santiago. Unha forma de espiritualidade poeticamente recollida nas fotografías que Manuel G. Vicente tomou ao longo do Camiño durante as últimas décadas, na ruta e nos seus albergues. Esta entrañable acollida fúndese coa vivencia do encontro, a solidariedade, a amizade e mais a comprensión mutua. A todo iso hai que engadir os valores paisaxísticos, a historia compartida e a cultura.

Unha experiencia de comunicación e afectos
A medida que avanzan as xornadas, prodúcese no Camiño unha comunicación a varios niveis. En primeiro lugar, do peregrino consigo mesmo, pois a linguaxe interior é esencial na experiencia da peregrinación. Coa introspección chégase a unha autoconstrución reflexiva e personalizada, na que cadaquén recrea as súas vivencias a través da memoria e os afectos.

En segundo lugar, establécese unha comunicación co propio Camiño e, por último, cos seus compañeiros de ruta, cos hospitaleiros e os paisanos. O espazo mental ou espiritual do Camiño de Santiago, evocado e recreado, configúrase dende a afectividade de quen o vive; vilas, cidades, sitios históricos e paisaxes naturais asumen valores afectivos nesta construción espontánea. Un marco sensible no que se desenvolve unha fecunda comunicación entre o peregrino e o seu contorno natural e humano.

Espazo: Museo das Peregrinacións e de Santiago

Dirección: Praza das Praterías. Santiago de Compostela

Data: 12 de decembro de 2023 – 30 de marzo de 2024

Organiza: Turismo de Galicia. Xunta de Galicia.