Xapón

Exposición “Os Camiños de Kan-non e Santiago. Espiritualidade e Cultura” 🗓

Xacobeo_jcr — Wed, 04 Oct 2023 09:52:02 +0000

Exposición fotográfica realizada con motivo do acordo de amizade asinado entre o Camiño de Kan-non e o Camiño de Santiago.

O Camiño de Santiago e a ruta Kumano kodo están irmandados desde 1998. Ambos son itinerarios de peregrinación declarados pola UNESCO Patrimonio da Humanidade. En 2023 cúmprense vinte e cinco anos deste irmandamento. O desenvolvemento da “peregrinación dual” logra que os peregrinos de Kumano e Santiago que cubran cada itinerario poidan obter unha acreditación dual, como peregrinos de Santiago e Kumano. Agora únese a esta harmonización de camiños de peregrinación o camiño Kan-non, considerado o itinerario de peregrinación máis antigo do País do Sol Nacente e designado Patrimonio de Xapón en 2019.

O Saigoku kan-non é orixinario do século VIII, contando con mil quilómetros de percorrido e unha espiritualidade baseada na natureza. Os peregrinos de Kan-non visitan trinta e tres templos budistas situados na rexión de Kansai, a rexión central de Honshu, illa principal do arquipélago xaponés, e atravesa sete prefecturas: Wakayama, Osaka, Nara, Kyoto, Shiga, Hyōgo e Gifu.

Ademais dos trinta e tres templos oficiais, existen nesta ruta outros tres templos coñecidos como bangai. A característica principal dos devanditos templos é que en todos eles a imaxe principal é Kan-non, coñecida polos occidentais como o Bodhisattva da Compaixón.

Hai que destacar a coincidencia dalgúns trazados desta ruta co Kumano kodo, de modo que algúns templos pertencen ao Saigoku kan-non e ao Kumano kodo.

Os peregrinos obteñen o seu Nokyocho, documento que acredita a súa peregrinación polo Saigoku kannon, tras o selado da súa credencial de peregrino nos trinta e tres templos da ruta. A diferenza da peregrinación a Compostela, realizada a pé, dacabalo ou en bicicleta, os peregrinos do Kan-non poden usar diversos medios de transporte e pódeno realizar en diversas etapas ao longo da súa vida.

Lugar: Hospedería de San Martiño Pinario. Santiago de Compostela

Data: do 6 de outubro ao 5 de novembro de 2023

Organiza: Turismo de Galicia. Xunta de Galicia

Colabora: Japan Foundation e Japan Heritage-Saikoku

O conselleiro de Cultura e Turismo realiza unha viaxe institucional á Prefectura de Wakayama en Xapón

Xacobeo_jcr — Tue, 04 Dec 2018 07:29:54 +0000

O conselleiro de Cultura e Turismo, Román Rodríguez, realizou un tramo do Kumano-Kodo, a ruta de peregrinación xaponesa declarada Patrimonio da Humanidade pola UNESCO. Durante o seu percorrido, destacou o impacto cultural, turístico e de dinamización económica que orixina o fenómeno da peregrinación nas zonas polas que transcorren as rutas, uns factores que o itinerario xaponés comparte co Camiño de Santiago.

Ambas as dúas rutas están irmandadas desde o ano 1998, un nexo de unión cuxas pontes se fan máis sólidas co paso dos anos. De feito, este percorrido polo Kumano-Kodo é o primeiro dos actos que o titular de Cultura do Goberno galego realiza en Wakayama con motivo da conmemoración dos 20 anos de irmandamento entre Galicia e Xapón.

Ademais de realizar un tramo da ruta xaponesa –no cal estivo acompañado polo director do Centro de Patrimonio Mundial de Wakayama, Hiroshi Tsujibayashi–, o conselleiro tamén visitou o Kumanu Hongu Taisha, un dos tres templos sagrados do camiño. Así mesmo, coñeceu o propio Centro de Patrimonio Mundial, que se atopa fronte ao santuario.

A Asociación de Amigos do Camiño de Santiago en Xapón celebra o seu décimo aniversario

Xacobeo_jcr — Tue, 13 Nov 2018 09:39:20 +0000

A Asociación de Amigos do Camiño de Santiago en Xapón cumpre dez anos e a Consellería de Cultura e Turismo acompañou en Tokio na celebración desta efeméride aos membros e directivos deste colectivo, convertido nun dos referentes xacobeos deste país asiático.

O acto de celebración tivo lugar na embaixada de España na capital xaponesa convocado ao obxecto conmemorar este acontecemento. Coa súa presenza, o Goberno autonómico puxo en valor o traballo desta asociación, unha das entidades distinguidas recentemente na última edición dos Premios Camiño de Santiago, convocados por este departamento da Xunta.

No acto recoñeceuse o importante papel que desenvolve no ámbito dos hospitaleiros dos albergues do Camiño de Santiago axudando cada ano aos cada vez máis numerosos peregrinos xaponeses na súa peregrinación. A Consellería de Cultura e Turismo tamén agradeceu o seu labor de divulgación coa edición de guías e a organización de charlas, seminarios e conferencias arredor da peregrinación; así como coas tarefas de sensibilización que desenvolve entre a sociedade xaponesa.

Galicia e Tanabe renovan os lazos de unión entre os camiños de Santiago e o Kumano Kodo

Xacobeo_jcr — Mon, 01 Oct 2018 07:53:46 +0000

O presidente do Goberno galego, Alberto Núñez Feijóo, e o alcalde de Tanabe, Mitsutoshi Manago, renovaron hoxe os lazos de unión entre os Camiño de Santiago e o Kumano Kodo.

O vindeiro 9 de outubro cumpriranse vinte anos desde que o presidente Manuel Fraga e o gobernador da prefectura de Wakayama, Isamu Nishiguchi, firmaran un acordo para irmandar os dous camiños.

Este irmandamento traduciuse nun acicate para as relacións bilaterais entre os dous territorios que se reforzan, ano tras ano, a través de visitas institucionais como a que realizou o príncipe Naruhito en 2013 na que percorreu un tramo do Camiño de Santiago; a viaxe do presidente da Xunta en 2014 ao país nipón; ou a visita á Comunidade do primeiro ministro, Shinzo Abe.

Así mesmo, a irmandade entre Santiago e Tanabe tradúcese en numerosas actividades, entre as que destaca a credencial dual establecida para as persoas que percorren ambas as rutas, contribuíndo así ao fenómeno de internacionalización das peregrinacións. E os programas de intercambio para a xuventude de Galicia e de Wakayama permitirán este ano, no marco do programa Xuventude, que 30 mozos galegos entre 18 e 30 anos vivan unha experiencia enriquecedora para a súa formación.

A Xunta de Galicia solidarízase coas vítimas e familias das catro prefecturas de Shikoku (Xapón) afectadas polas chuvias torrenciais

Xacobeo_jcr — Fri, 13 Jul 2018 07:12:28 +0000

Turismo de Galicia e a S.A. de Xestión do Plan Xacobeo solidarízanse coas vítimas e familias das catro prefecturas de Shikoku (Xapón), Ehime, Kagawa, Kochi e Tokushima, afectadas polas chuvias torrenciais caídas entre os días 5 e 10 de xullo, que provocaron desprendementos, movementos de terras e inundacións nas rexións do suroeste do país. Máis de 184 falecidos, 61 desaparecidos e 23.000 mil persoas desprazadas nas rexións que padecen esta traxedia: Hiroshima, Okayama e Shikoku. Nesta illa as prefecturas Ehime e Kochi, con 28 falecidos e tres persoas desaparecidas, son as máis damnificadas.

O camiño de peregrinación dos 88 templos de Shikoku, denominado Shikoku henro, ten unha orixe vinculada ás prácticas devocionais do monxe Kukai (Kobo-Daishi), introdutor en Xapón a principios do século IX do Budismo Shingon, continuadas polo pobo a través dos séculos. O Shikoku henro ten unha especial relación co Camiño de Santiago, a través do Protocolo Xeral de Colaboración asinado en 2015 pola Xunta de Galicia e as prefecturas de Ehime, Kagawa, Kochi e Tokushima.

Nava Castro recibe a unha delegación de peregrinos xaponeses tras percorrer o Camiño de Inverno

Xacobeo_jcr — Mon, 11 Jun 2018 08:26:37 +0000

A directora de Turismo de Galicia, Nava Castro, e o xerente do Xacobeo, Rafael Sánchez, xunto a unha representación de alcaldes e concelleiros de varias das localidades polas que atravesa o Camiño de Inverno, recibiron en Santiago de Compostela a unha delegación de peregrinos xaponeses que estivo percorrendo nos últimos días este itinerario para promovelo entre o mercado xaponés e para conmemorar o 150 aniversario das relacións diplomáticas hispano-niponas.

A delegación estivo formada, entre outros, polo secretario do Consulado Honorario de España en Takamatsu, Yoshihiko Takaki, así como por membros da Asociación de Yokohama e España, que coñeceron durante os últimos días o patrimonio cultural, enogastronómico e natural do Camiño de Inverno, unha das rutas xacobeas oficializadas tras a aprobación da Lei de Patrimonio Cultural de Galicia en 2016 impulsada pola Xunta. Como punto de partida e tras este recoñecemento, desde Turismo de Galicia reforzouse xa a sinalización existente e se editou unha guía específica sobre este itinerario xacobeo. Trátase do anticipo do proxecto de sinalización, mellora e acondicionamento que se realizará seguindo o cronograma previsto no Plan director e estratéxico do Camiño de Santiago que se está a levar a cabo en todos os itinerarios xacobeos cos que conta Galicia.