O presidente da Xunta avanzou a Programación do Xacobeo 2021, no marco da reunión da Comisión Organizadora e co obxectivo de facer un Xacobeo 2021 para todos, con todo e en toda Galicia.
A Xunta ten en marcha numerosas iniciativas como: o programa O teu Xacobeo, grazas á cal os galegos están facendo realidade centos de proxectos artísticos, culturais, sociais ou innovadores en toda a Comunidade, cun apoio de 8 millóns de euros; ou o Son do Camiño ; e o proxecto 3Camiños, unha serie de ficción que se rodará en 3 continentes e 5 países, cun argumento que se artella arredor dun grupo de mozos que, nun momento crucial das súas vidas, deciden emprender o Camiño de Santiago, e que se distribuirá internacionalmente, cunha audiencia prevista de 5 millóns de espectadores.
Tres grandes exposicións debuxarán o Ano Santo desde unha perspectiva nunca vista. A primeira delas, Galicia, un relato no mundo, xa está en marcha e é a máis visitada da historia da Cidade da Cultura; de maio a decembro do ano que vén, abrirase a mostra Galicia de Nós a Nós, coa que se celebrará o centenario da conformación da Xeración Nós e da Revista Nós, xunto a outros eventos ao longo de todo o 2020; e a exposición Galicia Futuro terá lugar de abril a setembro de 2021, cunha reflexión do futuro da comunidade tendo en conta os ámbitos sociais, económicos e culturais.
No apartado da edición literaria, xa están en marcha dúas publicacións baixo o título A Catedral de Santiago: unha visión integral. A restauración e conservación da Catedral 2011-2027, que farán accesible para o público non especializado a fascinante historia da Catedral, desde o inicio da súa construción ata os nosos días, co relato de destacados especialistas.
Así mesmo, e para que o Xacobeo 2021 sexa para todos e con todos, desenvolverase o Xacobeo Cidades, con música, artes escénicas ou exposicións organizados en colaboración cos concellos da Coruña, Ferrol, Lugo, Ourense, Vigo e Pontevedra; e cunha programación na que están contempladas 120 actividades e ás que está previsto que asistan máis de 300.000 persoas.
Co mesmo espírito organizarase, tamén, o Xacobeo en Camiño, co que se chegará ás principais vilas e cabeceiras de comarca, uns 76 concellos, a través de 1.400 actividades.
Fotografía: Xacobeo 2010_Concerto de Jean Michel Jarre