A exposición O Camiño de Santiago. Unha Experiencia Contemporánea de Peregrinación é unha nova expresión de creatividade contemporánea vinculada á cultura xacobea. Este magnífico proxecto desenvolverase ao longo do presente ano por varios lugares de EE.UU. Boston e Chicago terán a oportunidade de achegarse ao Camiño de Santiago a través das magníficas fotografías e do audiovisual que compoñen a mostra, cuxo autor, Manuel Valcárcel está obtendo grande éxito e recoñecemento internacional.
En Boston, a exposición englóbase no programa da primeira edición do Camino Filme Festival Boston, que proxectará varias películas sobre o Camiño de Santiago e que contará coa participación do experto no Camiño de Santiago, Francisco Singul.
Para o peregrino contemporáneo a experiencia do Camiño de Santiago é única e irrepetible. Ademais de evocar a peregrinación medieval a Compostela, en contacto permanente co medio natural e o pasado histórico, camíñase por un itinerario espiritual enriquecido polas pegadas dos peregrinos que o frecuentaron durante séculos. Esta carga emotiva, froito dunha rica cultura e unhas tradicións que permanecen vivas -a hospitalidade é un destes sinais de identidade-, refórzase coa presenza viva duns sitios históricos que son Patrimonio da Humanidade. Cidades, vilas, conxuntos históricos ordenados ao redor de catedrais, mosteiros, igrexas e hospitais. Lugares e paisaxes en íntima relación coa peregrinación e cunhas rutas xacobeas que rematan na meta dun dos itinerarios culturais máis significativos do mundo.
Actualmente a experiencia da peregrinación a Compostela propicia un encontro do peregrino consigo mesmo, pero tamén cos outros peregrinos, compañeiros de ruta, coa poboación local e co marco espectacular dun Camiño universal e aberto, que sempre foi entendido como un espazo sacro. Ao final desta aventura física e espiritual, o encontro coa cidade de Santiago e a súa catedral concrétase na íntima visita á tumba do apóstolo Santiago o Maior e co abrazo á imaxe do altar maior. A suxestión do complemento do Camiño ata o Finisterrae europeo (cabo Fisterra) é fundamental para comprender a mentalidade medieval dos peregrinos, un lugar de gran significado ao que se adoita acudir tras completar a experiencia do Camiño no santuario compostelán.
Lugar: Emerson College, Campus de Harvard. Boston (EEUU)
Data: do 12 ao 14 de outubro de 2018
Organiza: Xacobeo 2021. Turismo de Galicia. Xunta de Galicia
Colabora: Real Colexio Complutense de Harvard
Patrocina: Correos