Fírmase un acordo para a creación da Federación Internacional de Asociacións de Amigos do Camiño Portugués de Santiago

As distintas asociacións de amigos do Camiño Portugués asinaron, nun acto celebrado no Parador de Tui, un acordo para a creación da nova Federación Internacional de Asociacións do Camiño Portugués de Santiago. A posta en marcha desta federación reforzará o papel das asociacións de amigos do Camiño de Portugués tanto en Galicia como no país veciño á hora de traballar a prol dos valores tradicionais da peregrinación e da súa preservación e difusión.

Este acordo prodúcese no ano no que a Consellería de Cultura e Turismo dedica as principais accións do Plan director do Camiño de Santiago ao Camiño Portugués e ao Camiño Portugués da Costa, coa súa sinalización e mellora ou actividades de dinamización cultural e promoción, entre outros. Neste sentido, Galicia e Portugal están a traballar xuntas no proxecto europeo Fazer Caminho, que aspira optimizar as sinerxías ao redor da ruta xacobea neste territorio. O Camiño Portugués, con máis de 62.000 peregrinos, estase a consolidar como o segundo itinerario más percorrido cun crecemento do 14,5%. Pola súa banda, o Camiño Portugués da Costa recibiu no que vai de ano máis de 12.000 peregrinos, o que supón un 88% máis.