O Comité Internacional de Expertos do Camiño de Santiago prepara a celebración dun congreso mundial durante o Xacobeo 2021

Galicia acollerá o vindeiro Xacobeo 2021 un congreso internacional que, baixo o título Santiago de Compostela: camiño do saber, do andar e do crer, reunirá a expertos de todo o mundo para promover o debate científico e académico ao redor das peregrinacións das tradicións xacobeas e cultos locais. Así o acordaron os membros do Comité Internacional de Expertos do Camiño de Santiago, que se reuniron no Centro Internacional de Acollida ao Peregrino, en Santiago de Compostela, para facer balance das súas actividades e avanzar nas futuras.

Deste xeito, ademais deste congreso internacional, tamén acordaron celebrar outro en 2019 ao redor do arcebispo de Santiago de Compostela, Berenguel de Landoira. Tamén intensificarán a súa colaboración coa Cátedra do Camiño de Santiago e as Peregrinacións –organizada pola Universidade de Santiago de Compostela co impulso de Turismo de Galicia– coa celebración dun encontro mundial de Centros de Estudos Xacobeos. O Comité de Expertos reforzará ademais o seu papel internacional con maior presenza en ámbitos como o británico para afondar nas rutas de peregrinación marítima.

O Comité Internacional de Expertos do Camiño de Santiago é o órgano asesor da Xunta de Galicia no eido xacobeo desde a década dos anos 90. Ao abeiro do Plan director do Camiño de Santiago ten recuperado os Congresos Internacionais de Estudos Xacobeos e destaca, ademais, pola promoción que os seus membros desenvolven nos seus respectivos países, difundindo as publicacións científicas da Xunta, dirixindo revistas, teses e investigacións sobre o fenómeno xacobeo no seu territorio. Tamén realizan un intenso traballo no movemento asociativo vinculado ao Camiño de Santiago.